Colin McPherson

Mae Colin McPherson yn ffotograffydd dogfennol Albanaidd/Almaenaidd sydd wedi'i leoli ar Lannau Mersi ers 20 mlynedd.

Dyddiad: Dydd Mawrth, 3 Mawrth

Amser: 7pm (drysau ar agor 6.30pm)

Lleoliad: I fyny'r grisiau yn Oriel Colwyn

Dechreuodd yrfa Colin McPherson yn y maes ffotograffiaeth wrth weithio yn y papurau newydd lleol yn ei fro enedigol, Caeredin, cyn iddo symud ymlaen i weithio i bapurau a chylchgronau cenedlaethol, gan gynnwys dros 20 mlynedd yn yr Independent a’r Independent on Sunday, nes i’r wasg ddod i ben yn 2016. O ganlyniad, arddangosodd gyfres o luniau a thoriadau papur newydd o’i amser gyda’r wasg yn Oriel Colwyn yn 2017, ac rydym yn falch iawn o wahodd Colin yn ôl i siarad am ei waith yn y sesiwn Talk Photo arbennig hon.

Mae Colin yn arbenigo mewn prosiectau hirdymor, gan gynnwys Catching the Tide, cyfres sy’n dogfennu pysgota eog gyda rhwyd yn yr Alban, a ddechreuodd yn 1996, a gyhoeddwyd a’i harddangoswyd yn rhyngwladol.

Mae Colin yn cynnal ymgyrch Kickstarter ar hyn o bryd, gyda Dewi Lewis, er mwyn cyhoeddi llyfr o ddelweddau o’r prosiect, yr haf hwn. Gallwch ganfod rhagor am yr ymgyrch, a helpu i ddod â hi’n fyw YMA

Mae Catching the Tide yn bortread mynegiannol o bysgota eog gyda rhwyd dros 30 mlynedd yn yr Alban. Drwy ei ffotograffiaeth, mae Colin yn cyflwyno’r dynion y cafodd y cyfle i’w cyfarfod a gweithio gyda nhw dros dri degawd, wrth iddynt ymdrechu i wneud bywoliaeth o ffordd o fyw sy’n ymestyn yn ôl sawl cenhedlaeth, ac sydd bron â diflannu o gymunedau arfordirol y wlad erbyn heddiw.

Mae Colin wedi casglu archif sylweddol o luniau o ddiwylliant pêl-droed hefyd drwy ei waith ar gyfer y cylchgrawn misol ‘When Saturday Comes’. Cyhoeddwyd y gwaith hwn yn 2024 ar y cyd gyda’i gydweithwyr Paul Thompson a Simon Gill yn ‘At The Match’, crynodeb o luniau a dynnwyd dros y ddau ddegawd diwethaf.